كتبت الإعلامية زينة نعيم مقالا دعت خلاله إلى محاربة جشع وفساد التجار عبر صفحتها الرسمية على فيسبوك، وفيما يلي نص المقال:
التاجر اللي بيخبي البضاعة ويعطش السوق لحد ما سعرها يضرب في السما والناس تصرخ
ومقنع نفسه إن دي شطارة وتجارة ومكسب حلال!
الموظف اللي بيزوغ من شغله أو يعطل مصالح الناس وورقهم عشان يقبض رشوة متسمية شاي أو حلاوة
ومقنع نفسه إنه بياخد حقه من الدولة اللي مابتديلوش مرتب يكفيه!
المدير اللي بيمص دم الموظفين الصغيرين ويسرق مجهودهم وأفكارهم وينسبها لنفسه عشان ياخد هو الترقية والبونص
ومقنع نفسه إن ده حقه وتعب إدارته!
الشريك اللي بيستغفل شريكه ويضرب فواتير من وراه عشان يطلع لنفسه مصلحة في الخباثة
ومقنع نفسه إنه بيتعب أكتر منه فمن حقه يعوض الفرق!
دكتور قاعد في عيادته يدخله راجل غلبان مستلف تمن الكشف
يقوم يكتبله لستة أشعة وتحاليل ملهاش أي تلاتين لازمة
مش عشان التشخيص.. ده عشان يكمل التارجت بتاعه وياخد نسبته اللي متفق عليها مع المعمل!
وفلاح بيرش الزرع كيماوي ومبيدات تجيب السرطان عشان المحصول يكبر في يومين ويوزن على الميزان
وتلاقيه زارع قيراطين على جنب من غير رش.. عشان ياكل منهم هو وعياله!
 |
| زينة نعيم |
ومدرس بيشرح في الفصل من طراطيف مناخيره ويقفلها في وش العيال
عشان يذلهم ويجبر أهاليهم اللي طالع عينهم في المصاريف إنهم يبعتوهم السنتر بالليل!
تروح لميكانيكي يفكلك قطعة أصلية ويحطلك مضروبة
او يخترعلك عطل وهمي عشان يبعتك تشتري قطعة غيار من المحل اللي هو متفق معاه وبياخد منه نسبة!
تجيب صنايعي في بيتك يستحل مالك ويخليك تشتري خامات بآلاف ملهاش لازمة عشان يسرق الباقي وهو مروح
او يعملك الشغلانة اي كلام عشان تضطر تجيبه تاني وتدفعله مصنعية جديدة!
تطلب حاجة اونلاين يتبعتلك زبالة غير الصورة خالص ولما تيجي تشتكي البياع يعملك بلوك ويدخل يأكل عياله بفلوسك وهو مرتاح!
ومهندس أو مقاول يقلل الحديد ويضرب الأسمنت ويستخسر في الخامات عشان يلهف الفرق في جيبه
وهو عارف إن الناس هتدفع شقا عمرها في خرسانة مغشوشة!
النبي قالها واضحة (كل لحم نبت من سحت فالنار أولى به)
النار دي مش في الآخرة وبس.. النار دي كمان بتشوفها في دنيتك:
بتشوفها في ابن عاق بيطلع عينك وميطمرش فيه كل اللي بتعمله عشانه!
بتشوفها في عيل يعيا بمرض يشفط كل اللي حوشته بالحرام في ليلة واحدة !
بتشوفها في بيت مفيهوش ريحة البركة وخراب ووقف حال وعصبية ليل ونهار بينك وبين مراتك !
الحرام هيفضل حرام حتى لو سميته عمولة وإكرامية وتفتيح مخ وسبوبة وشطارة وماركتنج...
